غلطه

**الرمش الخجول** · 2009-03-26 09:30 مساءً

شرف على الدنيا وله قلب مثلوم
غريب لايعرف لا والد ولا أمه
....
غلطه رمت به قبل يتنفس اليوم
في باب مسجد لين من جاه خمه
....
شق الحياه وخاطره جدار مهدوم
تصفق به الدنيا على كل يمه
....
مقطوع من شجره..من العطف محروم
مجهول مايدرون خاله وعمه
....
واسمه من اسامي المخاليق مخموم
علامة استفهام حارت بفمه
....
كل ماتذكر قام فازع من النوم
يصرخ(يبه)(يمه)ولا حد يمه
....
عاش العمر موصوم بالشتم واللوم
وازداد همه فوق طابوق همه
....
قد قام يدعي الله والقلب مهشوم
على الذي شاري ملذه بغمه
....
يدعي على ام(ن) قدمت عرضها سوم
للذيب..وتلوث زمانه بدمه
....
وأصبح على دنياه غلطه وموصوم
باالعار..كل(ن) في زمانه يذمه
....
حتى تمنى الموت لوكان مسموم
يرحل ولا يسمع كلام(ن) يسمه
....
ولو خذاه الموت ماقيل مرحوم
قالوا ذلف ذاك المسمى بسمه
....
وش ذنبه اللي قدمه وازعل القوم
وش اقترف من مشكله من مطمه
....
حتى اصبح المجرم وبالذنب متهوم
والجرم في دنياه شاله وزمه
....
خلوه يحيا عمره انسان محشوم
والفرق بالتقوى كلام(ن) نتمه