في يوم من الايام العاديه من حياتي البسيطه .. وش بسيطه الا ناشفه من الحرمان ! في هذي الايام وايام الحرمان حدث مالم يكن بالحسبان حدث يوم غير تاريخ حياتي ودخلني موسوعه جينيس ...
كنت شاب بسيط منتف حالتي حاله الي يشوف حالتي يقول هذا جاي للدنيا بالواسطه طالع من بطن امه بالقوه .. يعني برنامجي اليومي فاشل بكل ماتعنيه الكلمه والرقم !!
وقت العصريه اجلس عند الباب لحد يأذن المغرب متكي اشوف اللي رايح والي جاي ماعندي لا شغل ولا مشغله لو اروح اسوي تدريبات سويديه احسن لي واصرف لصحتي بس ماش ماعندكم احد ..
وأول ماتغيب الشمس تنتعش شياطيني واروح ادشر بأرض الله ومثل العاده ولاجديد بالاسواق عشاي شاورما هذا عشاي من اربع سنوات شفتو كيف الحرمان مسوي فيني عيد الاستقلال !! اربع سنوات وانا حافظ جملة " شاورما بدون طرشي كثر شطه " !! عشان تعرفون اني حافظ هالجمله صمّ ولو افقد الذاكره ما انساها ..
مره من المرارير ياجماعه المخارير وقفني عسكري كنه موزه خربانه وفوق هذا نفسه بطرف خشمه الي كنه ورع ساجد وحرر لي مخالفه وسألني وش اسمي قلت له من الخوف معك " شاورما بدون طرشي كثر شطه " ,,, بأختصار شديد حياتي شاورما وجفاف اشبه بصحاري افريقيا بعز الصيف ..
وانا جالس عند الباب بوقت العصريه لمحت شي طايح حولي وزادت هرمونات اللقافه عندي ورحت اشوف وش هالشي واقرب منه والقاها خمسين ريال وادوس عليها برجلي مهوب عشانها وصخ دنيا .. لا لا عشان محد يشك اني لاقي شي !! وانا راص عليها برجلي التفت يمين للشارع مالقيت احد .. التفت يسار بشوف احد يشوفني ولا ..؟
يوم تأكدت ان محد يشوفني وانا اللي القط الخمسين ومادريت الا وانا سابق روحي ورى عمارة بيتنا .. بتأكد هي خمسين ولا ورقه مكتوب فيها الكاميرا الخفيه مع تحيات الملك .. يوم تأكدت انها خمسين ريال قمت اقبص نفسي ابي اشوف انا بحلم ولا علم .. بعد ما عرفت اني بعلم رجعت من ورى العماره والقى الخدامه قدامي من الفرحه سلمت عليها يد بيد وامشي والقى اخوي قمت اتبسم بوجهه وانا اعدل سروالي !! تعرفون الواحد لما تزود فرحته يفقد السيطره على شعوره .. سألني اخوي وش فيك كويتم ..؟ كان ودي اجاوبه بس للاسف من زود الفرحه اصبت بالخرس ..!
رحت اخذت لي كرسي وجلست عند النخله واقرى جريده .. لاتلوموني متأثر بالمسلسلات الخليجيه وحقين الشركات يحبون يجلسون بالحديقه ويقرون جرايد ويفكرون بمشاريعهم اليوميه وانا حاولت اسوي مثلهم لاني بعيش يومي ماكل يوم تجي معي فلوس .. ومثل ماكان يقولي عمي " ماكل يوم عيد افنك تعش ياصويلح " مع العلم ان اسمي مهوب صالح او صويلح بس عائلتنا غريبه وازودكم من الشعر منزل اخوي ينادي ولد عمي بأسم جبريل مع العلم ان اسمه الحقيقي ابراهيم بس مثل ماقلت لكم عائله غريبه مواليد العصر الحجري..
ماعلينا نرجع لمحور حديثنا وانا جالس عند النخله فكرت وين بروح لحد ماقررت اني اروح لستار بوكس الي بشمال الرياض (( باين اني محروم ))
وفعلا رحت ودخلت المحل وسألت الفلبيني وش عندكم..؟ وعطاني مينو القائمه قمت اقرى واشوف القائمه كلها اسامي قهاوي غريبه وصعبه النطق على واحد مثلي متعود على شاورما بدون طرشي وكثر شطه (( تراك غثيت امن جابتنا ))
اخترت قهوه نوع اسبريزو يوم جيت بقول جاء يمي واحد وطلب نوع قهوه صعب النطق بالنسبه لي لاني ماني متعود بس هو لا ابن الكلب قالها بسرعه كنه انا وانا اقول " شاورما بدون طرشي كثر شطه " والمشكله انه وقف عندي ماراح وانا انحرجت اطلب الطلب ولا اعرف اقوله وانطقه !! والفلبيني الكلب كنه داري اني بوضع هجمه مرتده ومنحرج من اللي جنبي سألني شنو يبي ..؟ انا اخذت نفس وقلت اسبرينوتشوووووووووه (( مسوي يعطس يصرف ))
قال الفلبيني يبغى اسبريزو !! هنا انا تنفست الصعداء وقلت ايه ايه ايه تكفى تكفى !!
يوم عطاني الفلبيني نضره مثل الي يقول بعطيك لو بلاش بس اسكت ..
رحت جلست على طاوله وجاء الطلب وانا خاش جو مع الالوان وكني بمراقص بانكوك ولا اسمع الا صوت كرات البلياردو تتصافق مع بعض يوم خش بعيني شخص ما وقال تسمح اجلس وياك ؟
انا رحبت فيه ومستغرب منه كرجل اوربي يجيد اللغه العربيه وجلس يسولف عن حضارات بلده ويقارن بينه وبين بلدنا وانا قمت اسطع عليه ان لي علاقات مع الدوله والحكومه والملك شخصياً !!ولمست بعيونه نضره مثل اللي مكذبني (( وهو صاادق ))
سألته قلت شكلك ماصدقتني ..؟ قال لا بس شكلك مايوحي بأن لك صله بالملك والطبقات العليا والناس الهاي هاي ثوبك من الوصخ لو تفصخه سحب كرسي وجلس معنى ثالث على الطاوله ويمكن يتكلم ويطلب قهوه !!
انا تداركت نفسي وجمعت وجهي الي تبعثر على الطاوله وقلت له وانا اغمز بعيني " إيعاد شبهه " وما ادري ليه ارتحت لك قمت افض فض لك من اسراري (( صرف الموضوع ياكاتم ))
قال حتى انا ارتحت لك معك شانون ازر من تل ابيب .. قلت ونعم مليون معك كويتم من البديعه ,,,
المهم ان شانون عزمني على العشاء ولبيت الدعوه وتعشينا واخذتنا السوالف عن امور الدوله السعوديه وشانون خوينا نادى الخادم وجاء الخادم معه شنطه فتحها شانون واحصلها كلها فلوس انا طلعت عيوني واناضر الفلوس ولاشعورياً قلت له : هاااااا كل شي ولا الشرف جدي وهو يحتضر وصاني على الشرف !! .. قال شانون لا لا ابيك عميل سري لدى اسرائيل ..!!
انا هنا حسيت اني بين شارعين وكل شارع فيه تفتيش !! ماقدر اقوله اكذب عليك ماعرف الحكومه والملك واخسر الفلوس ولو اخذت الفلوس من وين لي اجيب اخبار سياسيه..؟ فجأه تذكرت واحد من ربعي يشتغل بالاماره حارس امن لمواقف السيارات وهالشي شجعني اني اوافق على العرض المقدم من شانون ..!
يوم وافقت قال شانون اخذ الشنطه وابيك بكره تجيب لي خبر اي خبر اهم شي يخص الدوله واحس انك شغال وقد المهمه .. وتأكد لو تلف وتدور انهيك واكتب عنك قصه للأجيال القادمه ..
بلعت ريقي من الخوف وقلت مايصير خاطرك الا كل شي ان شاء الله بطران (( الخوف ومايسوي ))
طلعت من عنده توجهت للبيت وزبنت الشنطه وراح كل اليوم ادق على خويي اللي بالاماره وماش جواله مغلق رحت سنترت عند التلفزيون اشوف الاخبار ادور اي خبر وللاسف العراق ماكل الجو مجابت الاخبار شي يخص اهتمااماتي .. إنتهى اليوم وجاء بكره واشوف شانون متصل علي وبعد ماكرر الاتصال رديت عليه وقلت له ماعندي حالياً اخبار لانهم مشغولين بالدوري فلاكن بكره الخبر عندك ..! قال شانون شكلك ماقد دخلت مستشفى وطلعت محرول اخوك يدفك بعربيه ..؟ لكن بنتضر بكره وبشوف ..!
قلت له يارجال اذكر الله (( طبعاً الصوت كنه ددسن توه مشتغل الصبحيه بأيام الشتاء ))
صك السماعه بوجهي وانا منهبل ماحسيت بطعم الفلوس لأني مهدد ولافرحت فيها لان شانون ولد القرد المشلول اغتال ابتسامتي كأغتيال عيال عمه لأطفال غزه ..!
اتصلت على صديقي اللي بالاماره والحمد لله رد علي وجلست اتلكع عليه شوي وحسيت بطرف خبر واصك السماعه بوجهه وانقز لخزان السطح وادخل تحته وادق على شانون وكل شوي اطل اناضر السماء بشوف فلاش الاقمار الصناعيه هي تلقطني وتصورني ولأ ..؟
يوم رد علي شانون وانا ابولع بريقي قلت له اسمع شف جبت خبر بقوله لك واخر مابيني وبينك .. شانون خوينا تحمس وسألني وشهو الخبر بسررعه ..؟
قلت له شوف " الامير سلمان بن عبدالعزيز يداوم بالاماره الصبحيه بسياره فياقرا "
قال شانون والله ؟ مهوب يداوم على ددسن خمسه وثمانين مكتوب ورى "صبيا" ..؟ الحين منتضرك تقول روؤس نوويه واخر شي فياقرا..! إسمح لي انت بعداد الموتى طوط طوط ..
نزلت للملحق وانا اتنافض وخذلك وسوسه وابليس ماقصر قام يقولي هذولي يهود عيالة كلب .. شفت هالفلم اللي تتابعه وانت توسوس ماتضمن ان البطل يشر عليك بسلاحه ويذبحك من ورى الشاشه اشبك هذولي يهود ..! شفت النمله الي تمشي عندك الحين ..؟
والتفت واحصل جنبي نمله وطلعت عيوني سألت ابليس وش فيهاا ..؟
قالي ابليس وش يضمن لك انها ماتفك حزام نااسف وتفجر نفسها وتصير ذكرى قديمه ..!
ناضرت النمله حسيت انها تتحرك بتسوي شي واحط رجلي مادريت الا وانا زابن تحت سيارة ابوي وجنبي قطو يتعشى بروستد عقب عشاء ولد جارناا ..!
القطو هج من عندي وانا من الوسوسه قمت اعض عضام دجاج البروستد وافكر بشانون ووش بسوي معه .. ووش بجيب له من اخباار ..!
بالاخير رجعت للبيت واتصلت على شانون وقلت له عطني مهله اجمع لك اخبار منا ومنا واشوى ان شانون سكران وطالع كيلو اخلاق عطاني فرصه لاخر الاسبوع .. بعدها صرت افتح الدش على الاخبار .. وازعجت خويي اللي بالاماره لدرجه انه فكر يحرق الشريحه وبرواية اخرى قرر يدفنها بالربع الخالي ويرتاح من ازعااجي .. صرت امشي على بيوت الناس وانا منشب اذني على الجدران ابي اي خبر .. أي جلسه مع اخوياي اجيب طاري الحكومه والسياسه ابي اجيب لو طرف علم .. ومر اليوم الاول ماحصلت شي واليوم الثاني اتصل علي خويي الي بالاماره وقالي وش سالفتك انت متصل عشرين الف اتصال ومرسلي رساله مكتوب فيها " وش اخبار سلمان ؟ " سلامات لايكون سلمان واحد من العيال وتطلبه فلوس وتلاحقه هالملاحق !!
قلت له لا لا ابد هو خاطب اختي ونبي نشوف وشهو من لحيه (( مايعرف يصرف ))
وعلى قول المثل ما افدغ منه الا فديغ (( مثل من راسي )) خويي الافدغ صدق ان سلمان خاطب اختي طلع وجهه كله مع شاشة جوالي وهو يلمس لحيته ويقول تكفى توسط لي عنده .. قلت له ابد مالك الا يخليك مستشاره الخاص بس انت عطني معلوماات مايصير نزوج على عماها الدعوه مهيب قوطي بيبسي افتحه واشربه .. قال خويي صحيح صحيح ..!
خويي عطاني من هالاخبار النايمه الي ماتودي ولاتجيب لحد ما عطاني خبر حلو صكيت السماعه بوجهه واروح اركض للغرفه واصك الستاير واطفي اللمبات وافصخ ثوبي واسد فتحة الباب واشوف بالمكيف فتحه صغيره وانا الي افصخ سروالي واسدها واجلس على السرير بدق على شانون ويوم جيت بدق تذكرت كلام امي ان الجدران تسمع وتسجل !!
واطمر من السرير اركض لباب الشارع بروح للبراحه الي قدام بيتنا ناسي ان ماعلي الا سناوي .. ويوم وصلت نص البرحه وادق على شانون واسكر شوي اتصل علي قلت له شف جبت لك خبر واخر مابيني وبينك ولو تشوفني بمكان عاام لاتجي تقولي قد شفتك .. خلاص الي بينا لحد هالخبر وانتهى .. قال شانون اوكي ماراح احد يدري ومصلحتي من مصلحتك بس وشهو الخبر ..؟
قلت له لحضه بعطي الحاره نضره من بُعد قبل اقول الخبر .. قمت اناضر يمين و يسار والقى هندي يغسل السياره حقت جارنا رفعت الجوال قلت لشانون انتضر لما يخلص هالهندي مغسل السياره وصك السماعه .. لما انتهى الهندي مغسل السياره والحاره هجدت ماتسمع الا صوت مكيف يرنع وكان الوقت ايام دراسه دقيت على شانون وقلت له : اسمع ياشانون بقولك الخبر ولاتعرفني ولا اعرفك والخبر ترى [ الامير سلمان يدخن ونوع دخانه "روثمان" ] خذ العلم ياشانون انا متأكد من هالخبر متين بالميه .. قال شانون : والله كلام جميل يعدل المزاج وينشط خلايا المخ .. إنت صاحي ولا تمزح معي تبي تطيح الميانه ..! إنت شكلك مصمم ان امك تزورك بالدور الثاني مستشفى الشميسي وجسمك كله شاش كأنك هاللي بدعاية كفرات برجستون ..! انا يوم سمعت هالكلام انخرشت وطلعت على شانون بطلعه مايحلم فيها قلت له لحضه لحضه الوليد بن طلال مرسلي كول مي بدق عليه بشوف يالله مع السلامه ..
المشكله ان شانون صدق وقالي مع السلامه مشت عليه التصريفه ... لو اقول لواحد مجنون اني رحت للقمر اجمع تبرعات لجرحى لبنان يمكن يصدق .. لو اقوله اني رايح لمثلث برمودا حاضر مباراة وديه بين البرازيل والمانيا برضو يمكن يصدق .. بس لو اقوله ان الوليد بن طلال مرسل لي كول مي يمكن يرجع عقله ويصحى من قو الكذبه ..!
المهم بعد ماصدق شانون التصريفه رجعت للبيت وعدى اليوم الثاني وكنت جالس مع اهلي وهم يسولفون وانا مسرح مانيب يمهم سألني اخوي وش فيك ..؟ قلت ها وشهو سلمانه ..؟ لا بس اصبعي مصدع وبطني مزكم.. ماشفتَ ناقه ماره من هناا ..؟ وقمت بعد مالحست مخ اخوي وصار فوق راسه علامه استفهاام وجلست عند الباب يوم جاني ابليس الله يلعنه يوسوس لي وقالي شفت هالطياره الي تطير فوق وش يضمن لك يفتح الدريشه يهودي ويسلقط عليك قنبله من نوع سي فور ..!
وانا اللي اصك الباب واروح للغرفه وازبن واجلس مسنتر عند الاخبار واتابعها بدقه لما حسيت بطرف خبر قوي واخذ الجوال وانقز للسطح وادخل بوسط عشة حمام لإبعاد الشبهه واسوي نفسي حمامه ومثلت بضمير صادق لدرجه حسيت اني ببيض ..!
دقيت على شانون ورد علي وقلت له ادري اني جبت لك اخبار سببت لك افرازات بالغده الدرقيه لكن جبت لك الحين خبر صدقي .. قال شانون اخلص وشهو الخبر ..!
قلت له [ ترى قاعده الامير سلطان الجويه هي اكبر قاعده بالشرق الاوسط ] وهااا ياشانون لاتروح تنكب عفشي وتقولهم ترى كذا يزعل عليك اخوي الكبير يالله مع السلامه ولاتنسى امسح رقم جوالي .. قاطعني شانون وقالي تعال الحين لبرج المملكه الدور العاشر ..! قلت له صاحي ياشانون ؟ وش قالولك اول ما انولدت قمت انااهق حمار منذو الطفوله..؟ العنز وهي بهيمه لاسحبوها للمصلخ تنشب رجولها بالارض ماتبي الموت وانا تبيني اجيك لبرج المملكه ..؟ لا لا شكلك انت ياشانون الي تمزح معي تبي تطيح الميانه ..
قال شانون شف بيتكم الحين موقفه عنده سياره فورت وهوندا يعني انت مراقب لو ابي جبت اجلك الحين بس تعال احسن لك .. انا بلعت ريقي وعرفت اني حمار بجي للموت برجلي ورحت له لبرج المملكه ودخلت عليه وكان جالس على طاوله وجلست قدامه يناضرني بعين فيها ابتسامه وحقد ..!
قال شانون انا الحين مبسوط ومتضايق .. سبب اني متضايق اني تعاملت مع شخص ماخذ شهاده عالميه بالدلاخه وخذ فلوس ببلاش .. وسبب اني مبسوط اتذكر يوم اني ادرس بتل ابيب انفصل احد الطلاب ضُلم بسببي وانا اشوف ان ربي عاقبني فيك واتمنى ان الذنب راح ..
وخذ هالشنطه فيها فلوس وانا الي اقولك يا كاتم تكفى يرحم لي جدك السابع عشر اطلع من حياتي لاتعرفني ولا اعرفك واقلب وجهك على صفحه خمسه واربعين وامسك الباب ..! انا ماصدقت خبر لقطت الشنطه ونزلت وشغلت السياره ورحت للبيت واناضر الشنطه كم فيها ... ومرت الايام تلو الايام وتغيرت حياتي صرت اصرف علي اخواني الي كنهم فريق مدرسه وصرت ماعرف اقول "شاورما بدون طرشي كثر شطه" بسرعه لاني معد اشتري شاورما صرت اكل من كودو وهارديز اول لاجيت بقول "برقر ميكس" يجيني شد عضلي بلساني الحين اقولها بسرعه ... ومن كثر الفلوس طحت بشرب النبيذ الفاخر وذات ليله وانا سكران لحد الثماله وكنت اتسلق سطوح الكواكب مع اجواء النبيذ اتصلت على شانون ورد علي وقلت له [ الامير سلمان باع الفياقرا ويداوم الحين على لكزس ] ضحك شانون بقوه ثم سكت وقال اخـ تفووو عليك على عدد ماقالو لك الناس ياحمـااار ..!
أ.هـ
القصه من كتاب (( كفاحي والفقر )) قسم " اللعنه على الخونه "
التسجيل السريع إلى المنتدى
كاتم العميل السري لدى إسرائيل
العرض العادي
