شاعر الأسبوع : خالد الفيصل

[للغايب عذر]

" مرتاح أحبك "



مرتاح أحبك ولا علمت
حتى انت عييت ابين لك

والبارحة يوم أنا سلمت
شكيت لو عيني تدلك

برق لمع بالعيون وخفت
مواجع القلب توصل لك

عساك في ناظري ما شفت
كيف المعـاليق يومن لك

من خوفتي لا احترق جنبت
هربت من شمسك لـ.ظلك

أخشى عليك الهوى لو طحت
ما تلني يمك يتلك

أبي قليلك ولا حصلت
بعضك تركني مع كلك

ما ادري صواب او خطا ما قلت
إنك حبيبي وانا خلك

[للغايب عذر]

" فدوة عيونك "



فدوة عيونك لو غدت روح مغليك
وش عاد لو راحت لعينك عشاير

ابيع ما يغلى على الكون واشريك
و اسوق لى جتني علومك بشاير

و ازعّل جميع الناس بالحيل و ارضيك
و اصبر ولو دارت علَيّ الدّواير

و آخذ من ايّامي لك ايام واعطيك
وان راح عمري لك فلا هو خساير

احب انا شوفك و صوتك و طاريك
دايم وفكري فيك هايم وحاير

بالصمت اهوجس بك و بالصوت اناديك
و الله عليم البيّنه والسّراير

انا و قلبي و الهوى بين اياديك
عندك مفاتيح الهنا للضماير

من روحي احبك ومن روحي افديك
يامن غرامه و الحسن فيه ثاير

[للغايب عذر]

" إلى منه جفاك "


إلى منه جفاك اللي توده
ولا تدري وش اللي عنك صده

تجرع مالح العبرات واصبر
ترى كثر الشكاوي ما ترده

والى من الليالي عودت به
تغانم كل فايت واسترده

حذار تنشغل بعتاب خلك
ترى كثر العتب يمحي الموده

ليالي العمر لحظات قصيره
وماودعت منها لا تعده

تنهض مثل صقر مد شوفه
غداة الصبح روحه مستهده

إذا حول على جول الحباري
تولى خربها وان طار رده

ترى الرجال يثبت للشدايد
إذا ما هدها والا تهده

[للغايب عذر]

" لو نسيت "



لو نسيت العمر ما انسى دمعتك
صرخة ذابت من عيونك دموع

ترتعش مرتاعة فـي وجنتـك
وانتفض قلبي لها بين الضلوع

أزعجت صمت الليالي عبرتك
بالخفا ثوره وبالظاهر خشوع

تسكب الدمعه وتظمـى نظرتك
مشهد النظرة وهي تظمى يروع

يا ضياع العمر ضيعـة بسمتك
ضاع معها خافق مثلك جزوع

ليت من يمتص جارح لحظتك
والفرح يشعل دياجيرك شموع

[للغايب عذر]

" بشروني عنك "


بشروني عنك ما يدرون عني
ما دروا باللي شغل فكري وظني

اتسمع للحكي بك واتحفظ
خايف دقات قلبي يفضحني

كل ما سموك باسمك فز قلبي
والضماير والمدامع شاغلني

يا حبيبي يوم جنبت الحبايب
عفت لاجلك كـل من قبلك فتني

من عرف قربك عرف طعم السعاده
وان تشطرت ادرك غبون التمني

في هواك من العسل لذة مذاقه
لكن حروس النحل عنها حدني

ما عد اسمع بك ولا اوحي فيك عاذل
والعذارى جهل لـو داعبني

لك عيون فعلها بي فعل ظالم
من عرفتك يا الغضي ما ريحني

إن تفارقنا تغايا لي بليلي
وان تقابلنا دهني واخجلني

[للغايب عذر]

" ما ألوم قلبي "


مالوم قلبي لى انتفض عند طاريك
والعين تبكي شوفتك يا عناها

يا ليتني ما اشد عن جال واديك
واشارك الخلان صافي هواها

اقعد معك واشوف زولك واحاكيك
واوصل النفس الحزينة مناها

ياما حسدت ربوعك اللي حواليك
بالشوف يوم الله بقربك عطاها

اهواك انا واشتاق بالحيل واغليك
وارهي من اسبابك على العين ماها

ما نيب والله يا هوى البال ناسيك
مادام لي روح بوصلك هناها

[للغايب عذر]

" وقــف "

وقف ترى لي والهوى وانت ميعاد
يا من جمع بشفاه جمره وماها

طق اللثام ولا تبين لحساد
لا لا تخلي كل عين تراها

في شفتك جمر حمر فيه وقاد
أغليت انا لون الجمر من غلاها

اخاف من واهج شفاياك يزداد
يحرق ورود الخد واهج سناها

ورد على غصن من البان مياد
ورد نما في ظل رمش كساها

رمش على جال النوعيس صياد
ذبح القلوب اللي تعرض حماها

عقلي وقلبي منك في حرب وجهاد
واشوف دق القلب ميل خطاها

[للغايب عذر]

" الهوى "



ليه سموه الهوى يا اهل الهوى
أي معنى فيه من كلمة هوى

هو براد الصباح أو نسمة مسا
أو هو العاصوف بالصيف التوى

أو هو من الورد مرسول الشذا
أو هو اللي لو لمس ورد ذوى

أو هو اللي ناعم فوق الخدود
أو هو اللي لو ضرب صخر استوى

أو هو اللي رد تغريد الطيور
أو هو اللجلاج من ذيب عوى

أو هو اللي يصعد بعالي السما
أو هو اللي من سما العالم هوى

أو هو اللي دل من قلبه فطين
أو هو اللي كل قلب به غوى

أو هو اللي ماله ألوان وشكل
أو هو اللي من جميع أمر حوى

خبروني يا خبيرين الهوى
الهوى صدق او كلام في الهوا

[للغايب عذر]

" الساعه خمسه وعشرين "


الساعة خمسة وعشرين
لا تحسب الوقت بدري

من لا يسابق زمانه
يقعد والايام تجري

يا داله ما تنبه
الساعه خمسة وعشرين

في مـــاضي الوقت تجري
واللي معه علم يدري

تزاحمت بي هواجيس
ليت الهواجيس تسري

نادمت سود الليالي
تبيعني هم واشري

واعانق الطيف واحلم
واناغم اصوات شعري

يا حاجتي في حياتي
يا رغبتي طول عمري

افدي عيونك بروحي
وان مت بالحب بصري